¡Apúntate a Llingua Asturiana!

 

Entrevista sobre'l periódicu El Conceyu en Naguando d'El tren de RPA

  





El pasáu xueves,  28 de mayu, na sección Naguando del programa de RPA, El tren de RPA, ficiéronos una entrevista sobre’l nuesu periódicu EL CONCEYU, que ta concursando n’EL PAÍS DE LOS ESTUDIANTES y que ye l’únicu periódicu en Llingua Asturiana nesi concursu estatal. Amás tamién nos entrugaron pol nuesu blog y tolo que venimos faciendo. Intervineron, xunto al presentador del espaciu, Naciu Varillas, el profesor de l’asignatura, José Ramón Matilla, y l’alumnu de primeru de bachiller, Alfonso Suárez Rodríguez. Pa los que nun pudierais oyer el programa, equí te ponemos l’archivu la grabación.

Los xitanos que conoces y los que nun conoces

Dalgunos alumnos de primeru y segundu de la ESO, dellos d'etnia xitana, trabayaron nes caberes clases les biografíes de dalgunos de los xitanos más conocíos y d'otros que tamién son mui conocíos, pero de los que la xente  desconoz el so orixen xitanu. Esti trabayu ficiéronlu: Yésica Álvarez Díaz, Abigail Gabarre Jiménez, Marta Romero, Llucía Salazar Jiménez y Brenda Jiménez Hernández.




 

                                   

             

                                                     
       

EL CONCEYU

Periódicu col que participamos n'El País de los Estudiantes

    Por segundu añu consecutivu los alumnos de Llingua Asturiana del IES de Corvera d'Asturies participamos nel concursu periodísticu El País de os Estudiantes. Cuando escribimos estes ringleres alcontrámonos ente los diez finalistes del concursu na fastera d'Asturies. Si quies echa-y una güeyada al periódicu, equí tienes l'enllaz: 

http://estudiantes.elpais.com/periodico-papel/hemeroteca/Centro2019/Equipo3679/ver/index.html#/1/

    L'añu pasáu tamién participamos nel mesmu concursu col primer númberu d'EL CONCEYU, quedando finalistes n'Asturies con otros nueve periódicos, nos prósimos díes vamos poner l'enllaz, porque nesti momentu nun ta disponible.

Les Cueves d'Andía - As Covas d'Andía

Nel mes de marzu ficimos una escursión a Les Cueves d'Andía / As Covas d'Andía tolos alumnos de Llingua Asturiana, que mos prestó abondo. Guillermo Fernández y  Roberto Martín ficieron delles semeyes, qu'esbillamos en clas y coles que preparamos esti vidiu.

Una nueva moneda p'Asturies, l'Ástur

   Los/Les  alumnos/es d'asturianu de primeru de la ESO vienen d'inventar una nueva moneda p'Asturies, pa la qu'escoyeron el nome d'Ástur. Equí ufiertamos los diseños fechos, amestando una curtia biografía del personaxe al que se-y dedica'l billete, asina como'l nome del alumnu/a creador/a del billete y del testu.

 

LES MAZCARAES D'IVIERNU

    Una de les tradiciones más guapes qu'alcontramos n’Asturies son les Mazcaraes d’Iviernu, que se celebren dende la navidá hasta l’antroxu y nelles los mozos amarutense y van pidiendo l’aguinaldu pelos pueblos.

    L'orixe d'estes fiestes ye ancestral, y tán enllazaes coles fiestes romanes del entamu l'añu, que se celebran a finales de febreru y principios de marzu. Fiestes como estes alcontramoles n'otros llugares d’Europa.

    Nos primeros meses del añu, ente la navidá y el antroxu, entama l’añu agrariu y les mázcaraes yeren un ritual pa que ésti fuera bonu y diera perbones colleches. Les mazcaraes peninsulares y otres qu'hai n'Europa presenten una riesta elementos comunes, como son:

-Lloqueros.

-Elementos vexetales.

-Homes solteros.

-Pidida d'aguilandu.

-Pelleyes.

-Ceniza.

    La mayor parte les mazcaraes qu'había n'Asturies desapaecieron. asina pasó con “Los Bardancos” de Casu; los “Aguilandos” en Quirós, Teberga, Pravia, Salas y Tinéu; les “Farses” na Cuenca'l Nalón o  los “Guirrios” en Bimenes. Hai otres que se recuperaren, como “A reisada” en Tormaleo, “Os reises” de Velledor, “El Guilandu” en La Puela y Xendré, “; Los sidros” en Valdesoto y “El Guirria” de San Xuan de Beleñu.

    Equí vamos desendolcar dalgunes d'éstes mazcaraes. Esti trabayu vamos facelu n'andecha dalgunos de los alumnos de segundu cursu de la ESO de IES de Corvera d'Asturies. L'equipu ta formáu por Iyán Calmaestra, Carla González, Paula Guerra y Emma Jiménez.

LOS SIDROS O GUIRRIOS 

    Testu: Paula Guerra Cereijido / Dibuxu: Carla González Izquierdo

    El guirriu o sidru ye ún de los personaxes del antroxu.Estos personaxes acompañen a grupos de comediantes que representen diferentes comedies y piden l’aguilandu.

    El guirriu o sidru viste con camisa y pantalón blancu, polaines de pañu y una faxa colorada. Nel  cinturón de cueru lleven cascabeles y esquiles y una capiellín para cubrir la tiesta.En Sieru y en L.lena estí personaxe cubre la cabeza, l’arca y el llombu con una pelleya d’una oveja y como remate, un rau de raposu.

                      

EL GUIRRIA

  Testu: Emma Jiménez Triviño / Dibuxu: Carla González Izquierdo

     Ye un personaxe enmascaráu y provistu d’un llargu palu, col que se  ayuda para dar saltos, percorre’l pueblu y l’arrodía acompañáu de mozos a caballu: los “aguinalderos”, para recoyer el dineru y les invitaciones que-yos faen los vecinos. Trátase d’un ritu antigüu de fertilidá.

    Dicen dél que ye rei, bruxu, lleenda, y diablu per un día. Cuenten que los sos oríxenes piérdense xunto  col mitu del so personaxe. Y reconocen que too eso forma parte de la maxa y la tradición que llega cada Añu Nuevu al conceyu Ponga. Encabeza la comitiva del tradicional Aguilandu que’l primer día del añu cellebren los ponguetos.

    Pon la mascara y entós torna la lleenda al conceyu Ponga, a San Xuan de Beleño. Escoltáu por homes a caballu, el “Guirria” ye un personaxe casi invulnerable, un “superhome” pal nuevu añu qu’entama.

    El papel interpretalu un mozu del conceyu que dirá dando besos a les moces qu’alcuentre al so pasu y tirará ceniza y dará palos a quien-ylo impida. Los aguilanderos van pidiendo poles cases al llombu de los sos caballos llustrosos, acompañando al Guirria  na so incursión fantasmal peles cais de San Xuan.

                                   OS REISES DEL VALLEDOR

Testu: Illán Calmaestra Moreira / Dibuxu: Carla González Izquierdo

    Os Reises son una mascarada d’iviernu que se vien desarrollandu en El Valledor, Allande, desde tiempu inmemorial.

    Represéntase’l primer fin de semana l’añu. Ye una mazcarada de grupu, com dos equipos bien diferenciaos: los feos o “da ropa ruia” y los guapos o “da roupa boa”.

PERSONAXES:

El Choqueiru

Anuncia la llegada la comparsa saltando sobre cola so llarga vara d’ablanu y ximielguen les sos “chocas”. ¡Cuidau!, mantenéi les distancies, pues ye implacable protexendo al restu los mazacaritaos.

A Cardadora

La Vieya, carda llana ensin parar, filando la vida. A vegaes ocúrrese-y echar sal al fueu de lareiras y cocines y quiciabis os despioye mientres carda’l vuestru pelo y la vuestra ropa.

A Basoira

Fae sitiu a la comparsa barriendo col so inseparable basoira places y caminos. Corréi moces, quiciabis intente barrer los vuestros pies. Cuidáu vecinos, si nun dan bon aguilandu,  barrerá pa dientro les sos cases la suciedá y el mal.

El Rodalo

    Inquietu ya inagotable nun parará de facer trastaes col so rodalo, enredando, revolviendo y desfaciendo lo qe a su pasu alcuentre.

El Maragatu

    Esticomerciante, armáau cola so romana, pesará non sólu l’aguilandu, sinon tamiién cualisquier parte la anatomía que vustedes-yos permitan. Nun tienen mieu a la fame, pues gustosu ofrecerá-y un buen trozu de “queisu”.

La Maragata

    Acompaña al so maríu, anque tea prósima maternidá. Hai que tar atentos y preocupase d’ella, pues en cualisquier momentu pue dar a lluz.

Os Guapos

    Vinculaos al bien y a la modernidá, son los encargaos de pidir el aguilandu, baillar y canciar, agradeciendo lo recibío, o criticando si fuera menester.

A Gocha

    Al llegar a ca casa, entruga: “¿andamos, cantamos o andamos?” y encargaráse de guardar nel so sacu tolo algamao nel aguilandu.

El Valencianu

    D’impecable traxe blancu y sombreru con cintes de colores, y

El Militar

     Con uniforme y fusil, [el militar y el valencianu]canten y baillaen coles sos Madamas, vixilándoles de cerca cuandu tonteen colos vecinos. Ojo por tanto, non provoquen sus celos.

As Madamas

    Elegantes, pizpiretes y atrevíes, son más bien de moral distrayía y nun pierden ocasión de coquetear.

Os Músicos

    Siempres allegres y dicharacheros acompañen colo sos sones el camín de la comparsa y ponen música a los cantares d’Os Guapos.

MAZCARES D'IVIERNU EN ZAMORA

Testu: Emma Jiménez Triviño

    Estes mazcaraes tienen característiques asemeyaes a las mazcaraes d'Asturies.

Les mazcaraes de Zamora mas importantes son Los Cencerrones n'Abejera (Riofrío d'Aliste), La Vaca Bayona  n'Almeida de Sayago, Desempadrinamiento en Bercianos d'Aliste (San Vicente de la Cabeza), La Filandorra en Ferreras d'Arriba, El Zangarrón en Montamarta, La Vaquilla  en Palacios del Pan.

    Les principales característiques qu'estremen les mazcaraes d' iviernu na provincia de Zamora, y en general en Castiella y Lleón, son:

    -La dómina de cellebración, n'orixe, yeren los “Doce Díes Máxicos” que van dende Navidá hasta'l Día de Reis. Por delles razones, dalgunes de'elles treslladáronse a otres feches.

    -Emplegu xeneralizáu de mazcaraes demoníaques, zoomorfes o cares pintaes.

-    Úsense cencerros, esquiles o campanielles; faciéndoles sonar constantemente per toles caiss como recursu purificador de los males de la localidá.

-Emplegu de instrumentos fustigadores (tenaces, cuernos, trientes…) y lanzamiento de distintus materiales (ceniza, paja, farina…) o el roce con otrus, como corchus quemaos. Todos ellos tien un sentido fertilizador.

    - Los intervinientes, suelen ser mozos solteros, tanto na so organización como nel so desarrollu.

    - Las mazcaraes conlleven un ritu de paso de los xóvenes de la llocalidá a la edá adulta, mostrando les sos capacidaes organizatives, de fuercia física y destreza.

    - Desaróllense nos espacios públicos de la propia llocalidá.

    - Los intervinientes realicen peticiones d'aguilandu peles cases del pueblu y colo obtenio organicen comíes restrictives y o comunales que simbolicen la unión de los miembros del grupo

u o de la comunidad.

    - Coinciden una generación de desorden, carreres, ruios, glayíos, saltos… que suelen representar el caos invernal de la natura.

    - Los rituales tienen una notable carga simbólica o de maxa.

Esposición de trabayos sobre‘l magüestu

Los alumnos de primeru y segundu d’ESO  y bachiller trabayaron dellos aspeutos del magüestu (historia, vocabulariu, recetes, pregón,  les mazanes, el pumar, la sidra de duernu, les castañes y los sos oricios). Equí presentamos dalgunes semeyes que dan testimoniu d’esi llabor.

 

 

 

 

 

 

 

 

 

 

 

 

LA GUETA LES CASTAÑES

 

L’amagüestu n’Asturies

Alfonso Suárez Rodríguez 1ºA Bach

 
Alfonso Suárez Rodríguez ©

"Agostu secu, castañes en cestu; agostu moyáu, cestu apiláu" – Refrán asturianu

L'amagüestu o magüestu ye una folixa tradicional d’Asturies y de dalgunes zones del norte d’España, como Galicia (u recibe’l nome de magosto), Cantabria (u se conoz como magosta) y el País Vascu ( u se denomina gaztainerre o gaztañarre), asina como de Cataluña, Aragón y parte de Llión y Zamora. Ye tamién perpopular en Portugal, u se-y denomina magusto.

Alfonso Suárez Rodríguez ©

 "Castanea sativa", más conocía como castañal. Trátase del árbol que da les castañes, unes de les protagonistes del magüestu.

L’elementu común d’esta folixa ye la so celebración durante la seronda (nos meses de ochobre ya payares principalmente), y el tener como elementos principales les castañes y el fueu, amás de la sidra del duernu (zusmiu de la mazana acabante de mayar) nel casu d’Asturies

Hestoria

  Alfonso Suárez Rodríguez ©

 Cuerries en Villamayor, Piloña. Trátase d’una construcción pequeña y circular fecha de piedra, u s’echen les castañes acabantes de ser pañaes pa que curen. D’esti mou, l’oriciu despréndese más fácil del frutu.

 

Dende la prehistoria l’home alimentose de castañes, pero nun foi hasta la espansión del cultivu de les castañales polos romanos cuando esti frutu convirtióse na base de la alimentación de la población durante años a esgaya, como frutu frescu, secu o molíu pa facer fariña. Pero dende finales del sieglu XVIII, por mor de la colonización d’America, les castañes perdieron protagonismu na dieta campesino, y entamaron a ser sustituyíes pol maíz y les pataques.

En cuanto al orixe del términu "amagüestu", esisten varies teoríes. Hai quien diz que vien del llatín Magnus Ustus ("gran fueu") o Magum Ustum ( recalcando el caráuter máxicu del fueu); otros, que quiciabes venga de magnus, que pue significar "grande" o "magu, maxa". Tamién dalgunos defenden que vien del proto-celta magon- y glustu- (gran lluz) o magon- y ouxton- (gran cutu).

En cualesquier casu, toles teoríes consideren que'l amagüestu  ye una folixa d’orixe paganu, rellacionada cola fecundidá y el folclor del sol, que marca’l pasu de los ciclos agrícoles. Como otres folixes paganes, finó cristianizándose y asociándose col día de Tolos Santos.

La folixa

Tradicionalmente esta folixa realizábase cola gueta de les castañes, ye dicir, cola pañada d’esti frutu. Una vegada que les castañes yeren pañaes, introducíense nuna cuerria ( una

construcción de piedra), y dexábense curar ensin quitar l’oriciu.

Dempués, seleiciónense aquelles que tean en bones condiciones pal so consumu y, cuando les castañes tan yá preparaes, faese una foguera. Una vez que queda fecha áscuares, colócase enriba d’ella un cilindru metálicu tóu afuracáu llamáu tambor. Darréu, espárdense sobre esti recipiente les castañes, a les qu’enantes d’asales fízose-yos un corte pa evitar qu’españen.

Alfonso Suárez Rodríguez ©

Nel casu d’Asturies, amás, tómase la llamada sidra dulce. Los primeros fríos de la seronda son el meyor momentu pa pañar la mazana, mayala y convertila más tarde en sidra. Sicasí, esti llíquidu pue consumise enantes de qu’aformiente, lo que da llugar a esta bebida.

Alfonso Suárez Rodríguez ©

El magüestu pue aprovechase tamién pa consumir otros productos que se dan na seronda, como les ñueces y les ablanes.

L’amagüestu ye tamién un momentu nel que se realicen diferentes xuegos tradicionales, como los bolos ( nes sos distintes varientes), la llave, les carreres de llecheres, les de panoyes…Tamién tá presente la música ya los cuentos.

***